Pinetan hasi beharreko etapa Fanlotik abiatu da azkenean. Baldintza meteorologikoak direla eta, ibilbidea aldatu behar izan dugu. Fanlon bertan GR15a hartu eta aurreneko 18 kilometroak maldan behera egin ditugu, Brotoko anoa puntura iritsi arte. Handik aurrera, Bujarueloko helmugaraino dauden 13 kilometroetan, berriz, aldapan gora joan gara. Ibilbideak Añisclo arroila (Ordesako Parke Nazionalean) zeharkatu du. Bujaruelo bailara Ordesa eta Monte Perdido Parke Naturalean kokatzen da, mendiaz gozatzeko eta ibiltzeko tokirik ederrenetako batean. Etapa herrian bertan dagoen zubi dotorean bukatu dugu. Guztira, 31 kilometroko bidea eta 1.751 metroko desnibel positiboa.