MSK Zilina-Athletic partida, audientzia buru, % 25,2ko kuotarekin

MSK Zilina-Athletic norgehiagokaren zuzeneko emanaldia bere ordu-tartean audientzia buru izan zen, % 25,2ko audientzia-zatiarekin. Eguneko bigarren emanaldirik ikusiena izan zen, 'Teleberri'ren lehenengo edizioaren atzetik, albistegiak % 26,2ko audientzia-zatia lortu baitzuen asteartean.

Europa Ligako sailkapen faseko partidaren emanaldiak 320.000 ikus-entzuleko audientzia metatua bereganatu zuen Euskadin eta eragin-eremuan. Joaneko partida galdu ondoren, datorren astean jokatuko den itzuliko partidak ikusmin handia izango du jarraitzaile zuri-gorrientzat, eta ETB1ek San Mamesetik zuzenean eskainiko du norgehiagoka erabakigarria, ostegunean, 20:45etik aurrera.