Manifestazioak

UAGA Arabako nekazarien sindikatuak eta hainbat herri-plataformak deituta, Bilbo plazatik abiatu da manifestazioa. Antolatzaileen arabera, 5.500 manifestari inguru batu dira "Makroproiekturik ez. Lurra defenda dezagun" leloa zeraman pankarta erraldoiaren atzean.

Espainia Konstituzionalaren aldeko Plataformak elkarretaratzea egin du gaur eguerdian Madrilen, hauteskundeak eskatzeko, "batasunaren, duintasunaren, legearen eta askatasunaren alde". PPko eta Voxeko politikariek parte hartu dute ekitaldian.

Busturiak bere etorkizuna erabaki nahi duela aldarrikatu dute milaka lagunek Gernikan, "pertsonak eta natura erdigunean jarriko dituen etorkizuna" eta Urdaibai salgai ez dagoela azpimarratu dute. Diru publikoa "gutxi batzuen interesentzako eta natura suntsitzeko erabiltzea" bidegabe jo dute.

Guggenheim Urdaibai Stop plataformak manifestazio "zaratatsua" egin du 18:00etan hasita, Gernikan (Bizkaia), museo berriaren proiektua gaitzesteko.

Bi manifestazio egin dituzte aipatu hiriburuetan, neurri gehiago eskatzeko, eta kolore arrosarekin ez direla identifikatuta sentitzen adierazteko.

Gipuzkoan txirrindularitza probak antolatzeko zailtasunak dituztela salatu dute gaur eguerdian Gipuzkoako Txirrindularitza Federazioak, txirrindularitza taldeek eta txirrindulariek.

Israelek Gazako inbasioa abiatu zuenetik urtebete beteko da astelehenean. Larunbatean, manifestazioak egin dituzte palestinarren aurkako erasoak amaitzea eskatzeko; izan ere, Gazan bakarrik 41.000 pertsona baino gehiago hil ditu orain arte Israelek.

Deitzaileen arabera, 12.000 pertsona baino gehiago elkartu dira mobilizazioan; Espainiako Gobernuak Nafarroan duen Ordezkaritzaren arabera, aldiz, 2.000 baino ez. "Nazioarteko ebazpenak bete behar direla" azpimarratu dute bertan.

Milaka pertsonak Bilboko erdiguneko kaleak zeharkatu dituzte gaur Palestinako herriari eta erresistentziari elkartasuna adierazteko, Palestinarekin Elkartasuna plataformak deituta. Manifestazioaren buruan ikurrina bat eta bandera palestinar handi bat izan dira.

Patronala osatzen duten Inditex, Mango eta Primark kate handiek bilera dute gaur, Madrilen. Euren asmoa sektoreko euskal langileei ere Estatuko lan hitzarmena ezartzea da. Protesta egin duten langileen ustez, horrek zeharo okertuko lituzke lan baldintzak.

Egungo egoera konpontzeko bitartekoak exijitu dizkiote Osasunbideari, 3.500 biztanlerentzat sendagile bakarra dutelako herrian.

Manifestazio honekin amaitu dituzte asteon egindako mobilizazioak, eta Zamudioko lantegian kaleratutako 39 langileei babesa eman nahi izan diete horrela.

Gorren nazioarteko egunean, ahalik eta bizimodu normalena egiteko bitartekoak aldarrikatu dituzte. Halaber, zeinu-hizkuntza zabaltzeko eta babesteko eskatu dute, hezkuntza, osasun eta lan esparruetan atzean gera ez daitezen.

Eusko Jaurlaritza berria osatu zenetik lau hilabete igaro direla eta tarte horretan Ertzaintzaren lan hitzarmena negoziatzen hasi ez direla salatu nahi izan dute hiru sindikatuek.

Ernaik deitutako manifestazio batek Donostiako kaleak zeharkatu ditu gaur. Independentzia aldarrikatu eta Ertzaintzak Ernaiko 130 kideri baino gehiagori jarritako isunak salatu dituzte bertan.

"Erraustegia = Klima aldaketa" zioen pankartaren atzetik, erraustegiak airea kutsatzen duela eta erraustegien aldeko ereduak jendeak gero eta gutxiago birziklatzea dakarrela salatu dute.

Manifestazioa egin dute Ribabellosako herritarrek arratsaldean, Garraio Ministerioak, "Eusko Jaurlaritzak eta Arabako Foru Aldundiak babestuta", Burgos eta Gasteiz artean eraiki nahi duen abiadura handiko trenbidearen eta Arabako Bailaretan egin nahi dituzten zentral fotovoltaikoen proiektuen aurka.

ESK sindikatuak deituta, elkarretaratzea egin dute Laudioko herritarrek larunbat iluntzean, Alberto Acero plazan. Euskaraz eta gaztelaniaz irakurritako ohar batean, ''arreta mediko egokia ez jasotzeagatik'' pertsona bat hil dela salatu, eta Osakidetzaren "kudeaketa negargarria" gaitzetsi dute.

Lizarrako herritarrak Gazako setioa salatzera atera dira larunbat eguerdian Foruen plazara. Egunak joan, egunak etorri, odoljarioak etenik ez duela eta, Palestinako herriari elkartasuna agertu diote "Elkartasuna Palestinarekin. Genozidioari ez" zioen pankarta erakutsiz.

Zezenketen aurkako dozenaka militantek protesta egin dute larunbatean Bilboko zezen-plazaren aurrean, "zezenei tratu txarrak ematea eta hiltzea" salatzeko. Tentsioak gora egin du plazara zihoazen zale batzuek aurre egin dietenean, zezenketen aurkakoak irainduz eta iseka eginez.

Bilboko Konpartsek elkartasuna adierazi diote manteroen kolektiboari arratsaldean, Areatzan egindako elkarretaratze baten bidez. 'Manteroak ere lanean ari diren herritarrak dira, eta, beraz, eskubide berberak jaso behar dituzte', ziurtatu dute.

Milaka pertsonak justizia eskatu dute Indian, Calcuttako ospitale batean mediku bat bortxatu eta hil ostean. Emakumea 36 orduko txanda baten ondoren hil zuten, gela batean atseden hartzen ari zela. Emakumeen aurkako sexu-indarkeria etengabeko arazoa da Indian.

Hainbat ekimen aurkeztu dituzte Bilboko Aste Nagusirako konpartsekin elkarlanean, Palestinari buruz hitz egiteari utz ez diezaioten. Banderak banatu dituzte, baita Palestinako herriaren borrokaz hitz egiten duten abestien zerrendak ere.

Arabako hiriburuko mugimendu feministak zortzi eraso matxista salatu ditu elkarretaratze batean, jaiaren lehen bost egunetan. Oraingoz, bi bortxaketa salatu dituzte, eta Ertzaintzak ustezko erasotzaileetako bat atxilotu du, 21 urteko gizon bat.

Gaintxurizketako bizilagunek protesta egin dute GI-636 errepideak gune horretan duen arriskua salatzeko. Haserre daude, ez baita puntu beltz horretan halakorik gertatzen den lehen aldia.  

Herriko bizilagunek elkarretaratzea egin dute gaur arratsaldean plazan, poliziak itxitako prostituzio-etxean ustez egindako legez kanpoko jarduerak salatzeko.

Kuoten sistemak plazen % 30 eskaintzen zien Independentzia gerrako gudarien ondorengoei. Ikasleen protesten ostean, sistema bertan behera utzi du Gobernuak, baina Poliziarekiko liskarrek ez dute etenik izan.

39 polizia-agente zauritu dira eskuin muturreko manifestariekin izandako liskarretan. Astelehenean labankadaz hil ziren neskatoen aldeko ekitaldi baten ostean gertatu dira istiluak.