Poesia garaikidea protagonista, Castillo Suarezen Euskaltzaindiko Sarrera-hitzaldian

Castillo Suarez Garcia idazle nafarrak gaur goizean, Akademiaren barne-arauek agintzen duten moduan, Sarrera-hitzaldia irakurri du. Euskaltzaindiak 2022an izendatu zuen euskaltzain oso, eta, ohikoa denez, izendapenarekin batera Sarrera-hitzaldia egitea dagokie euskaltzainei. Gehienetan, sorlekuan egin izan dute, eta halaxe egin du Suarezek, Altsasu jaioterrian. 

Akademiak Osoko bilkura egin du 10:00etan, Altsasuko udaletxean; ondoren, herriko txistulariek lagunduta agintarien segizioa Iortia Kultur gunera iritsi da, Altsasuko ezkila errepikarekin batera. Ekitaldi instituzionalari hasiera emateko Javier Ollo Altsasuko alkateak ongietorria egin die bertaratutakoei, Andres Urrutia euskaltzainburuarekin batera. Sahatsa eta Pi eta Juantxo Zeberio musikariek lagundutako ekitaldian, 150 euskaltzain eta herritar bildu dira.

Sagrario Aleman eta Miren Agur Meabe euskaltzainen eskutik sartu da altsasuarra bere Sarrera-hitzaldia ematera. Landareen bidez harilkatu ditu bere bizitzan eragina izan duten poema liburuak 'Maitasunaren botanika' izeneko antologia pertsonalean. Euskaltzaindiak ohar batean azaldu duenez, "hautatutako landareek idazlearen poetikaren ezaugarriak erakutsi dituzte hitzaldian zehar, hala nola idazteko ausardia, ekintzailetza politikoa, oroimena, hiztegigintza, biziraupenerako gogoa..." 

Miren Agur Meabek gutunen bidez eman dio erantzuna. "Poetikari eta estetikari buruzko gogoeta intimo" modura planteatuta, poeta nafarraren gai batzuk aipatu ditu —galera, bakardadea, maitasuna, mina, langintza, erresistentzia...— eta harremanetan jarri ditu mundu zabaleko beste idazle batzuen pasarteekin, hala nola Emily Dickinsonekin, ezkilek nola, idazleak ere hala oihartzunaren bila euren sarrera-hitzaldietan.

Azkenik, euskaltzain berriak karguaren zina egin du "Euskaltzaindiaren xede eta helburuei eta euskaltzain izateari dagozkien eginkizunak zintzo eta leialki" beteko dituela esanez, eta euskaltzain osoaren domina, diploma eta ikurra jaso ditu Andres Urrutia euskaltzainburuaren eskutik. Ekitaldiaren amaieran, giro alaian, Altsasuko zortzikoa dantzatu dute dantzari, agintari eta herritarrek.