Alaphilipperen garaipena, erakustaldia emanda; Van Avermaetek lidertza sendotu du

Julian Alaphilippe frantziarrak (Quick Step) irabazi du Annecy eta Le Grand-Bornand artean jokatu den Frantziako Tourreko 10. etapa, 158,5 kilometro bete ostean. Greg Van Avermaet belgikarrak (BMC) elastiko horiari eusteaz gain, areagotu egin du bere ondoren sailkatuta daudenekiko aldea.

Alaphilippe bera bakarrik heldu da helmugara 4:25:27ko denborarekin. Haren ondoren sartu da Ion Izagirre (Bahrain) ormaiztegiarra bigarren postuan, 1:34ko atzerapenarekin; Rein Taaramae estoniarra (Direct Energie) hirugarren helmugaratu da, 1:39ra.

Van Avermaet liderra laugarren izan da etapan (1:42), eta lehen postuan jarraitzen du lehen baino abantaila handiagoarekin.

Lasterketa irabazteko faborito direnen tropela 3:24ko atzerapenarekin heldu da. Bertan ziren, besteak beste, Mikel Landa, Nairo Quintana (Movistar), Chris Froome (Sky) eta Tom Dumoulin (Sunweb).

Horrenbestez, Avermaetek 2:22 minutu ateratzen dizkio une honetan bigarren sailkatuta dagoen Geraint Thomas britainiarrari (Sky). Alejandro Valverde murtziarra hirugarren da sailkapenean, 3:10era. Bere aldetik, Mikel Landa murgiarra zortzigarren tokira igo da, eta 3:21 segundoko atzerapena dauka liderrarengandik.

Asteazken honetan, Tourreko hamaikagarren etapa lehiatuko dute txirrindulariek Albertville eta La Rosiere artean (108,5 kilometro).