Egan Bernalek bereganatu du Okzitaniako Ibilbideko sailkapen nagusia

Egan Bernal kolonbiarrak (Team Ineos) Okzitaniako Ibilbidea eskuratu du astearte honetan, Lectoure eta Rocamadour artean (195 km) jokatu den lasterketako azken etapan (laugarrena) eutsi egin baitio sailkapen orokorrean zeukan aldeari. Bernal, astelehenean jarri zen lider, etapa nagusian garaipena erdietsi eta gero.

Azken jardunaldiari dagokionez, Benoit Cosnefroy frantziarra (AG2R) izan da garailea, eta Ineos taldeko 23 urteko txirrindulari gaztea laugarren helmugaratu da, Bauke Mollema (TSF) eta Thibaut Pinot (FJD) lehiakideen atzetik. Omar Fraile (Astana) bizkaitarra, berriz, hamalaugarren izan da etapan, irabazlearengandik 22 segundora.

Horrenbestez, Bogotako txirrindulariak Alejandro Valverderen lekukoa hartu du Okzitaniako Ibilbidean, eta hamaseigarren garaipena lortu du profesionaletan,. Horrez gain, sentsazio bikainak azaldu ditu urteko bere hitzordu handienari, Frantziako Tourrari, begira.

Bestalde, Tourra lau aldiz irabazi duen Chris Froomek 37. postuan amaitu du lasterketa, Bernal taldekidearengandik 9:26ra.