Bi euskal txirrindulari, emakumezkoen Movistar taldearen fitxaketen artean

Lourdes Oyarbide (Asparrena, Araba, 1994) eta Eider Merino (Balmaseda, Bizkaia, 1994) datorren denboraldiari begira Movistar Teamek izango duen emakumezkoen taldeko partaide izango dira, Movistar berak gaur jakinarazi duenez. Guztira zortzi taldekideren izenak plazaratu ditu, tartean aipatutako bi euskal txirrindulariak.

Bai Oyarbide, bai Merino Bizkaiko bi taldetik fitxatu ditu Movistarrek. Lehena, Bizkaia-Durangotik joango da telefoniako taldera eta bestea Lointek Team-etik.

Alabaina, ez dira bi talde horietatik Movistarrera jauzi egingo duten txirrindulari bakarrak; izan ere, beste lau txirrindularik ere bide bera egingo dute. Horrela, Mavi Garcia (Balearrak, 33) eta Lorena Llamas (Bartzelona, 30) Bizkaia-Durangon jardun dute aurten eta Alicia Gonzalez (Asturias, 22) eta Alba Teruelek (Valentzia, 21), berriz, Lointek Teamen.

Beste bi txirrindulariak atzerritarrak izango dira, Malgorzata Jasinska (33, Cylance Pro Cycling) poloniarra eta Aude Biannic (26, FDJ) frantziarra.