Orduko errekor berria egin du Jens Voigtek

Orduko errekorra hautsi du Jens Voigtek (Trek) Suitzan, Grenchen (Suitza) hiriko belodromoan. Alemaniako txirrindulariak marka berria ezarri du: 51,115 kilometro. Azken errekorra Ondrej Sosenkarena zen: 49,7 kilometro egin zituen ordubetean, 2005ean.

Voigtek ere ez zuen espero hain azkar joatea. 204 itzuli eman zizkion belodromoari. "Oso pozik nago. Irabazteko azken aukera zen nire bizitzan. Azkenean erraza izan da. Nik uste baino azkarragoa izan naiz. Oso motibatuta nengoen, gero makaldu egin naiz, baina hogei minutura banekinen lortu ahal nuela", esan du Voigtek.

17 urteko ibilbide luzeari amaiera bikaina jarri dio Voigtek. 20 itzuli handitan parte hartu du, zazpi talderekin. Frantziako Tourreko parte-hartzeen errekorra du, George Hincapie eta Stuart O'Gradyrekin batera, 17 aldiz korritu baitu Tourra.