Andrea Vendramek irabazi du Sappadan, bakarka, ihesaldiko indartsuena izan baita

Decathlon AG2R taldeko Andrea Vendrame txirrindulari italiarrak irabazi du, ostiralean, 2024ko Italiako Giroaren hemeretzigarren etapa, Sappadan, bakarka, eguneko ihesaldiko indartsuena izan baita; izan ere, ihesaldiko gizonek alde handia lortu dute, tropelarekiko. Bitartean, sailkapen nagusian, UAE Emirates taldeko Tadej Pogacarrek lider jarraitzen du, maglia arrosa soinean duela; ez da nabarmentzeko moduko aldaketarik izan ziklista esloveniarra buru duen sailkapenean.

Profil gorabeheratsua zuen etapak, bigarren zatian, eta maila handiko ihesaldi batek markatu du eguna. Hemeretzi txirrindulari sartu dira lasterketa buruko multzoan, eta garaipena euren artean jokatu ahal izateko moduko aldea lortu dute. Amaierarako 50 kilometro baino gutxiago gelditzen zirela, 2. mailako Passo Duronen, iheslarien arteko erasoak hasi dira; Julian Alaphilippe (Soudal) ahalegindu da lehenengo, ihesaldian gizon batzuk lehiatik at utzita, eta, gerora, helmugarako 28 kilometro aurretik zituztela, Andrea Vendramek jo du aurrera. Italiarrak minutu inguruko aldea lortu du, berehala, atzetik zihoazen ziklistekiko.

Ederra izan da ikustea zein ondo heldu dion egoerari etapako garaipenak. Vendramek, 29 urtekoa bera, bazuen Giroko etapa bat palmaresean, 2021ean ere erdietsi baitzuen, eta orain, beste behin, maisutasuna erakutsi du ihesaldietan, argi utzi du trebea dela, eta lasterketa oso ondo ikusten duela. Euria izan du lagun, eta ibilbidea ez zen batere erraza; baina, nolanahi ere, alde handiz helmugaratu da, eta denbora luzea izan du lortutako garaipena ospatzeko.

2:20

Andrea Vendrame italiarra nagusi izan da Sappadan

Atzean, sailkapen nagusiko lehian dabiltzan gizonen artean, ezer gutxi jazo da. Hori bai, Geraint Thomasek (INEOS) sustoa izan du, sei kilometro gelditzen zirela; galestarrak erorikoa izan du, baina ez omen zaio ezer larririk gertatu. Hirugarren sailkatuak segituan egin du bat multzoarekin; lasterketako onenek larunbateko jardunaldi gogorrerako gorde dituzte indarrak.

1:42

Geraint Thomasen erorikoa Giroko 19. etapan, helmugarako 6 kilometro falta zirenean

Larunbatean, 2024ko ekitaldiko azken mendiko etapa izango da Italiako Giroan, hogeigarrena. Alpagon irten eta Bassano del Grappan amaituko da, eta 184 kilometroko ibilbidea du; tartean, txirrindulariek 1. mailako Monte Grappa igo beharko dute, bi aldiz.

Etapako sailkapena

1 - VENDRAME Andrea (Decathlon) 3:51:05

2 - SANCHEZ Pelayo (Movistar) + 0:54

3 - STEINHAUSER Georg (EF Education) + 1:07

4 - NARVAEZ Jhonatan (INEOS) + 2:27

5 - PLAPP Luke (Jayco) d. b.

6 - VELASCO Simone (Astana) + 2:30

7 - TRATNIK Jan (Visma) d. b.

8 - VALGREN Michael (EF Education) d. b.

9 - ALAPHILIPPE Julian (Soudal) + 2:32

10 - HERMANS Quinten (Alpecin) + 3:52

Sailkapen nagusia

1 - POGACAR Tadej (UAE) 71:24:03

2 - MARTINEZ Daniel Felipe (BORA) + 7:42

3 - THOMAS Geraint (INEOS) + 8:04

4 - O'CONNOR Ben (Decathlon) + 9:47

5 - TIBERI Antonio (Bahrain) + 10:29

6 - ARENSMAN Thymen (INEOS) + 11:10

7 - BARDET Romain (DSM) + 12:42

8 - RUBIO Einer (Movistar) + 13:33

9 - ZANA Filippo (Jayco) + 13:52

10 - HIRT Jan Soudal (Soudal) + 14:44