Filippo Ganna aise nagusitu da Turinen eta bera da Giroko lehen liderra

Filippo Ganna italiarrak irabazi du 2021eko Italiako Giroko lehen etapa, erlojupekoa, eta bera da, ondorioz, lasterketako lehen liderra.

Ineoseko txirrindularia iaz ere lehen liderra izan zen eta aurten aurreikuspenak bete ditu, aurkarien gainetik igarota. Nagusitasunez gailendu da Turinen jokatutako 8,6 kilometroko erlojupekoan.

Gannak orduko 58 kilometroko abiadura egin du batez beste, eta ia 10 segundo atera dizkio Eduardo Affini bigarren sailkatuari.

Joao Almeida izan da faboritoen artean onena, laugarren egin du, eta Remco Evenepoel gaztea zazpigarren izan da, Gannak baino 19 segundo gehiago eginda.

Euskal txirrindulariei dagokienez, denborarik onena Jonathan Castroviejok egin du. Bizkaitarra 13. izan da, 27 segundora.

1. etapako eta sailkapen orokorreko sailkapena:

1 - GANNA Filippo (INEOS) 8:47
2 - AFFINI Edoardo (Jumbo) 0:10
3 - FOSS Tobias (Jumbo-Visma) 0:13
4 - ALMEIDA João (Deceuninck) 0:17
5 - CAVAGNA Rémi (Deceuninck) 0:18
6 - VAN EMDEN Jos (Jumbo) 0:18
7 - EVENEPOEL Remco (Deceuninck) 0:19
8 - WALSCHEID Max (Qhubeka) 0:19
9 - BRÄNDLE Matthias (Israel) 0:22
10 - MOSCON Gianni (INEOS) 0:23