2022ko Euskal Herriko Itzuliko 1. etaparen profila eta ibilbidea: Hondarribia – Hondarribia (7,5 km)

Euskal Herriko Itzuliaren estreinako etapan, azken urteotan lasterketak hartu duen bideari eutsiz, bakarkako saioa izango dute ziklistek Hondarribian, aurreneko berotua hartu eta euren aurkezpen txartela erakusteko.

Lehen bi txirrindulariak lasterketan Kern-Pharmako Daniel Mendez (14:26) eta Euskaltel-Euskadiko Ibai Azurmendi (14:27) izango dira; Julian Alaphilippe 16:34an irtengo da, eta Adam Yates (15:23), Ion Izagirre (15:45), Gorka Izagirre (16:10), Rigoberto Uran (16:40), Mikel Nieve (16:54), Remco Evenepoel (17:12), Pello Bilbao (17:18) eta Primoz Roglic (azkena, 17:20an), besteak beste, ikusteko aukera izango da bertan.

Katearekin gora eta behera ibili beharreko 7,5 kilometroko jardun laburra izango dute parte-hartzaileek aurrez aurre. Aldapatxoak, harbidea eta kale estuak aurkituko dituzte Gipuzkoako kostaldeko herri arrantzaleko alde zaharrean barna.

Horrez gain, lehendabiziko igoera puntuagarria idoroko dute ibilbidearen erdialdera, 3. mailako gaintxo bat, hain justu ere, Mendiko Sariaren elastikoaren lehen jabea nor izango den erabakiko duena. Kilometro eta erdiko luzera duen igoera horretako hasierako 500 metroetan, batez beste, % 9ko maldak gainditu beharko dituzte.

Sailkapeneko oilarren artean alde handirik egotea espero ez den arren, test garrantzitsua izan daiteke garaipenaren borrokan zein txirrindulari egon daitezkeen ikusteko; izan ere, asmoak asmo, beti izaten da itxaropentsu etorritako bakarren bat, eguna okertu eta aukera guztiak zapuztuta geratzen dena aurreneko egunean.

Iazko ekitaldian, laugarren etapako amaiera hartu zuen Hondarribiak, eta bertan Ion Izagirrek eta Pello Bilbaok lehia estua izan zuten etapa garaipenaren bila. Azkenerako, ormaiztegiarrak bereganatu zuen loria.

Ikusi 2. etaparen profila

PROFILA:

2022ko Euskal Herriko Itzuliko 1. etaparen profila. Argazkia: Itzulia

------------------------------------------------------

IBILBIDEA:

2022ko Euskal Herriko Itzuliko 1. etaparen ibilbidea. Argazkia: Itzulia

------------------------------------------------------

------------------------------------------------------

2022KO ITZULIKO IBILBIDE OSOA:

2022ko Euskal Herriko Itzuliko ibilbide osoa. Argazkia: Itzulia