Buchmannek hirugarren amaitu du, helegitea jarri ostean

Emanuel Buchmann (BORA Hansgrohe) alemaniarrak sailkapen nagusiko hirugarren postuan amaitu du 2019ko Itzulia, antolakuntzak azken etaparen ostean BORA taldeak jarri duen helegitea onartu ondoren. Hala jakinarazi du Itzuliko presidentea den Julian Erasok.

Buchmann sei txirrindularik osatutako multzoan zihoan, eta azken bidegurutzean, erratu egin da. Ondorioz, hasiera batean, podiumetik at geratu da. Hala ere, BORA taldeak helegitea aurkeztu du lasterketako Epaimahai Teknikoaren aurrean eta Epaimahai Teknikoak onartu egin du. Gauzak honela, 15 segundo gutxiagoko marka eman diote Buchmanni helmugan.

Ondorioz, Ion Izagirrek (Astana) amaitu du sailkapen nagusiko lehen postuan, Daniel Martin (UAE Emirates) izan da bigarren, eta Emanuel Buchmann (BORA Hansgrohe) hirugarren. Azkenean, Jakob Fuglsang (Astana) izan da laugarren, eta podiumetik at geratu da. Izagirrek 29 segundo atera dizkio Martini, eta 31 segundo Buchmanni. Fulgsang, liderrarengandik 36 segundora.