Tanaya Atkinsonek ez du Kutxabank Araskin segituko

Kutxabank Araskik astearte honetan iragarri duenez, Tanaya Atkinson jokalariak ez du Gasteizko taldean jarraituko datorren denboraldian. 2021eko udan heldu zen Araskira Clarinos Tenerifetik, eta berdez jantzita bi denboraldi eman ostean, Estatu Batuetako hegalekoak taldea utziko du.

Denbora tarte horretan Atkinsonek pilatutako zenbakiak zeharo azpimarragarriak dira; izan ere, Araskiren historiako saskiratzailerik onena bihurtu da, 925 punturekin, klubeko bi jokalari historiko gaindituta: Maria Asurmendi eta Natalie van den Adel. Era berean, estatubatuarra erreboteen zein asistentzien sailkapenean ere nabarmendu da, hirugarren tokian baitago lehendabizikoan (331 errebote), eta bosgarrenean, bigarren arloari dagokionez (138 asistentzia).

Araskik argitaratutako oharrean, "zorterik onena" opa dio jokalariari bere etorkizun pertsonal eta profesionalean, eta egindako lanarengatik eskerrak emanez agurtu da Made Urietak zuzentzen duen klubak: "Eskerrik asko, Nay!".

Jokalariak ere agur esan dio klubari bere sare sozialen bidez.

2 years representing your colors & it’s a bittersweet feeling saying goodbye! Thank you to my coaches, staff, teammates, & fans for making my time special. Araski, you will always have a place in heart & be family away from home for me. Gracias por todo @Araski ¿ pic.twitter.com/VdZlGIMn0U

— Nay Atkinson (@tanayaatkinson) April 24, 2023