Kirolbet Baskonia, aukerarik gabe Palau Blaugranan (77-67)

Bartzelona Lassak hankapean erabili du Kirolbet Baskonia Euroligako 23. jardunaldian, eta erraz gailendu zaio Gasteizko taldeari: 77-67.

Etxekoek nahikoa izan dituzte lehenengo 20 minutuak Baskonia inolako aukera gabe uzteko. Pesicen taldeak joko bikaina egin du zati horretan, eta Kevin Seraphin (15 puntu eta 6 errebote) eta Thomas Heurtel oso eraginkor aritu dira (11 puntu eta 9 asistentzia).

Lehen laurdenak norgehiagokaren nondik norakoa baldintzatu du. Bartzelonaren defentsako lana eta jarduera fisikoa ikusgarria izan da; arabarrak, ordea, antzu ibili dira saskira begira, eta gogotik ordaindu dute.

Tarte horretako estatistikek argi erakusten dute gasteiztarren ezintasuna: bi puntuko 14 jaurtiketa egin dituzte eta hiru besterik ez dituzte sartu. Hiruko jaurtiketei dagokienez, ez dute bakar bat ere lortu, bost saiakera egin arren. Jaurtiketa libreetan ere, oker; bostetik hiru saskiratu dituzte.

Horrez gain, errebote lanetan ere gehiago izan da Bartzelona, eta horrek guztiak 13 puntuko aldea ekarri dio Kopako txapeldun berriari lehen laurdenaren amaieran (22-9).

Bigarren laurdena ez da askoz hobea izan Perasovicen taldearentzat, Kevin Seraphin pibotaren nagusitasuna pairatu behar izan baitu saskipean. Frantziarra kantxan zela, katalanek neurketako alderik handiena (25 puntu) lortu dute (44-19, 16. minutuan). Dena dela, Baskoniak markagailuko zuloa zertxobait murriztu du atsedenaldira iritsi aurretik (46-26).

Partidari berriro ekin diotenean, Baskoniak defentsako lana sendotu du, eta 10 punturaino hurbildu da bi aldiz (54-44, 27. minutuan, eta 67-47, 32. minutuan). Aitzitik, katalanak partidaren kontrola berreskuratzeko gai izan dira une horietan, eta azkenean ez dute arazorik izan garaipena erdiesteko.

Horrenbestez, Bartzelonak 14 lehia irabazi ditu dagoeneko; Baskoniak, berriz, 11 garaipenekin jarraituko du.

Fitxa teknikoa:

77 - Barça Lassa (22+24+16+15): Pangos (9), Kuric (4), Claver (2), Singleton (9), Tomic (4) –hasierako bostekoa–; Seraphin (15), Ribas (15), Hanga (2), Heurtel (11) eta Oriola (6).

67 - Kirolbet Baskonia (9+17+19+22): Vildoza (9), Janning (6), Shields (18), Voigtmann (2), Diop (-) –hasierako bostekoa–; Huertas (7), Poirier (5), Jones (8) eta Hilliard (12).

Epaileak: Christos Christodulou (Grezia), Carmelo Paternico (Italia) eta Saso Petek (Eslovenia). Ez dute inor kanporatu.