Baskoniak erakustaldia eman du Joventuten aurka

Baskonia Endesa Ligako dinamikara itzuli da igande honetan eta garaipena lortu du Divina Joventut taldearen aurka (81-45) Buesa Arenan. Euroligatik at geratu ostean, denboraldia lehen lau sailkatuen artean amaitzea da Baskoniaren helburua playoffetan zerrendaburu izateko eta aurrerapausoa eman du. Sailkapeneko hirugarren postuan da Gasteizeko taldea.

Norgehiagokako lehen minutuak parekatuak izan dira, baina hasierako hamar minutuetako azken txanpan Arabako taldeak zazpi puntuko abantaila eskuratu du (17-10). Bigarren laurdenean jaun eta jabe izan da Baskonia eta partida atsedenaldira iritsi denerako zuloa zabaldu du markagailuan (43-25).

Atsedenalditik kantxara itzuli ostean, neurketaren gidoia ez da aldatu eta 'Sito' Alonsok zuzentzen duen taldeak aurretik lortutako abantaila handitzea lortu du, 28 punturainoko aldea lortuta (63-35). Azken laurdenerako dena erabakita egon da, eta Baskoniak erakustaldia biribildu du Joventuten ezintasunaren aurrean. Amaieran, Gasteizeko taldea garaile (81-45).

Fictxa teknikoa:

81 - Baskonia (17+26+20+18): Larkin (11), Hanga (11), Budinger (6), Tillie (2), Diop (10) -hasierako bostekoa-, Shengelia (8), Luz (4), Voigtmann (4), Beaubois (10), Blazic (10), Laprovittola (3) eta Sedekerskis (2).

45 - Divina Seguros Joventut (10+15+10+10): Sabat (3), Abalde (6), Vidal (5), Bogdanovic (4), Jerome Jordan (14) -hasierako bostekoa-, Dimitrijevic (1), Lapornik (-), Ventura (5), Smith (-), Nogues (-), Stutz (3) eta Gielo (2).

Epaileak: Juan Carlos Garcia Gonzalez, Francisco Jose Araña eta Martin Caballero.