Baskoniako eta Izar Gorriko jokalariek Hodeiren kamiseta eramango dute

Laboral Kutxa Baskonia eta Izar Gorria saskibaloi taldeek ostegunean Gasteizko Buesa Arenan jokatuko duten partidan, desagertutako Hodei Egiluz gaztearen argazkia daramaten kamisetak jantziko dituzte. Galdakoko mutila 2013ko urriaren 19an desagertu zen, Anberesen.

Hodei Bila taldeak azaldu duenez, ekimenak Anberesen desagertutako ingeniari informatikoaren bilaketak aurrera jarrai dezala bultzatzea du helburu. Ekitaldia taldeak antolatu ohi dituenen artean dago, Belgikako poliziek galdakoztarraren bila jarrai dezaten.

Beste ekintza batzuen artean, Athletic eta Real Madrilek aurreko urrian Bernabeun elkarren kontra jokatu zuten partidan Hodeiren aurpegia zeramaten kamisetak jantzi zituzten norgehiagoka hasi baino minutu batzuk lehenago.