Bilbao Basketek Rafa Martinez eskolta beteranoa fitxatu du

Bilbao Basketek asteazken honetan iragarri duenez, Rafa Martinez eskolta katalana fitxatu du denboraldi baterako, Valentzia Basket taldean 11 urteko ibilbidea egin eta bertako saskiratzaile historiko nagusia bihurtu ondoren.

Rafa Pueyo bilbotarren kirol zuzendariaren esanetan, 37 urteko jokalaria Bilboko taldeko "erreferentzietako bat" izateko asmoz iritsiko da Miribillara, bere "kalitate eta esperientzia handiari" esker. Aipatu esperientzia horrek "aldagelan liderra izatea" ekarriko duela espero dute Bilbon, "gazteei ACB zer den uler dezaten laguntzeko".

ACB Ligako historiako estatistika ugaritan nabarmendu da Martinez bere ibilbidean zehar, besteak beste, hirukoetan (5.a da sailkapen horretan, eta hiruko jaurtitzaile onena izan zen 2016-17 eta 2017-18 denboraldietan), jokaturiko partida kopuruan (23.a da, 532 lehia jokatuta), puntuetan (42.a da), jokaturiko minutuetan (36.a da) eta asistentzietan (49.a da). Manresatik ere igaro ondoren, Bilbao Basket izango da bere ibilbideko hirugarren taldea.

Horrez gain, honako titulu hauek irabazi zituen Valentziarekin: hiru Eurokopa (09/10, 13/14 eta 18/19), Endesa Liga bat (16/17) eta Superkopa bat (2017).