Bilbao Basketek hirugarren garaipena jarraian nahi du

Bilbao Basketek UCAM Murtzia hartuko du igande honetan Bilbao Arenan (19:00), Endesa Ligako hirugarren jardunaldian. Bilbotarrek orain arte jokatutako bi partidak irabazi dituzte, eta oraingoan hirugarrena eskuratzea dute helburu.

Estreinakoz lortuko luke Bilbao Basketek garaipena ligako aurreneko hiru jardunaldietan. Montakit Fuenlabradaren aurka nagusitu ziren Miribillan (73-54) eta Andorran ere garaipena lortu zuten, luzapenean (75-76).

Sito Alonsoren taldeak sailkapen nagusiko bigarren postuari eutsi nahi dio, baina emaitzen arabera, lidergoan ere buka dezake asteburua. Murtziarrek ez dakite zer den Bilbon irabaztea (zazpi porrot jaso dituzte).

Danilo Andjusicek minduta jarraitzen du eta ezin izango du neurketan parte hartu, eta Borja Mendia ere baja izango da. Jokalari bizkaitarrak orpoko hezur bat hautsita dauka eta sei aste inguru eman beharko ditu geldirik.