Goitia-Del Rio eta Laduche-Manci partida, Winter Seriesen 8. jardunaldian, ETB1en eta eitb.eus-en

Alex Goitiak eta Julen del Riok Mikel Mancisidor 'Manci' eta Ludovic Laduche izango dituzte aurrez aurre, A taldean, Eusko Label Winter Seriesen 8. jardunaldian, Gernika-Lumoko Jai Alai frontoian. EITBk norgehiagoka ikusteko aukera emango du, ETB1en eta eitb.eus-en, 21:45etik aurrera.

Laducheren eta Manciren azken garaipenak Barandika eta Lopez —ordura arte, A taldeko faboritoak— finalaurreko ligaxkatik kanpo utzi zituen. Hala eta guztiz ere, oraindik ez dago garbi zein bikotek egingo duen aurrera. Goitiak eta Del Riok Laduche eta Manci baino 4 puntu edo gehiago behar dituzte. Lehen bikoteak bi partida dituzte hori lortu ahal izateko; bigarrenak, ordea, bakarra.

Laduche eta Manci menderatuta, eta emaitzaren arabera, Goitia-Del Rio bikoteak sailkatzeko aukera izango luke, nahiz eta Barandikaren eta Lopezen aurka galdu, abenduaren 23ko hitzorduan, txapelketaren 9. jardunaldian.