Jaka, zalantza Lau t'erdikorako

Erik Jaka ez da asteazkenean Arnedon egongo, Lau t'erdiko txapelketari dagokion pilota-aukeraketan parte hartzeko, lesio bat dela-eta. Lizartzakoak Elezkano II.aren aurka jokatu behar du larunbatean, txapelketako lehen jardunaldian.

Jakak min hartu du astearte arratsaldean, Mendizabal III.arekin batera Tolosan entrenatzen ari zela. Lan-saioan zehar pilota astintzean mina sentitzen joan da eskuin dortsalean; hain zuzen, ekainean lesioa izan zuen antzeko zonaldean. Arratsaldean plaka egin diote, baina ez dute ondorio garbirik atera, eta, horrenbestez, asteazkenean erresonantzia egingo diote, lesioaren nondik norakoak ezagutzeko.

Ezingo balu larunbatean jokatu, bere ordezkoa Retegi II.a litzateke.