Bi bikote finalerdietarako sailkatuta eta playoffetarako txartel bakarra jokoan

Jardunaldi bakarra falta da Binakako Txapelketako ligaxka amaitzeko eta azken jardunaldian bi bikote ariko dira playoffetara sailkatzeko txartel bakarragatik borrokan. Jaka-Zabaleta eta Ezkurdia-Martija bikoteek lortuta dute finalerdietarako sailkapena.

Playoffetan sartzeko azken txartela lortzeko lehia Olaizola II.a-Urrutikoetxea eta Irribarria-Rezusta bikoteen artekoa izango da, nahiz eta azken bikote horretan Elezkano II.ak ordezkatuko duen Irribarria, Aspek Aramako pilotaria baztertzea erabaki baitu. Olaizola II.ak eta Urrutikoetxeak garaipena lortu zuetn 13. jardunaldian Irribarriaren eta Rezustaren aurka (22-9), euren arteko averagea alde izatea lortuta. Ondorioz, Olaizola II.a eta Urrutikoetxea playoffetan izango dira, azken jardunaldian Elezkano II.ak eta Rezustak euren partida galtzen badute Lasoren eta Albisuren aurka, baita Elezkano II.a-Rezusta bikoteak garaipena lortu, eta Olaizola II.a-Urrutikoetxea bikoteak Ezkurdiari eta Martijari irabazten badio. Aimar Olaizola eta Mikel Urrutikoetxea kanpoan geratuko dira, Elezkanok eta Rezustak garaipena lortu, eta eurek galtzen badute. Bi bikote hauen eta Laso-Abisu bikotearen arteko berdinketa hirukoitza emango balitz, Elezkano II.a eta Rezusta kanporatuta geratuko lirateke.

Sailkapenari dagokionez, 13. jardunaldiaren ostean, argi dago Jakak eta Zabaletak lehen postuan amaituko dutela ligaxka. Larunbatean, aise mendean hartu zituzten kanporatuta dauden Victor eta Mariezkurrena (6-22). Bigarren postua bermatu zuten Ezkurdiak eta Martijak, Lasori eta Albisuri 22-21eko emaitzarekin irabazita. Laso eta Albisu sailkapeneko bosgarren postuan dira, ez dute postua ziurtatuta, baina bai playoffetarako sailkapena.

Artolak eta Imazek ziurtatuta dute hirugarren postua, Altuna III.ak eta Galarzak baino garaipen bat gehiago eta euren arteko averagea alde dutelako. Bestalde, Altuna III.ak eta Galarzak amaituko dute laugarren postuan, Lasori eta Albisuri averagea irabazita diotelako.