Finalerako txartel bakarra egongo da jokoan finalerdietako azken jardunaldian

Iker Irribarriak eta Jose Javier Zabaletak Binakako Txapelketako finala jokatzeko txartela eskuratu dute, finalerdietako ligaxkako lehen bi partidak irabazita. Ondorioz, finalerako txartel bakarra egongo da jokoan, azken jardunaldian.

Victor Estebanek eta Jon Ander Albisuk osatzen duten bikoteak ez du aukerarik, finalerdietako bi neurketak galdu ondoren. Beraz, Altuna III.a-Martija vs. Elezkano II.a-Rezusta partidan erabakiko da bigarren finalista. Neurketa Donostiako Atano III.a frontoian jokatuko da igandean, martxoaren 24an. ETB1ek eta eitb.eus webguneak zuzenean eskainiko dute jaialdia, 17:00etan.

Larunbatean, martxoaren 23an, Irribarriak eta Zabaletak jokatuko dute Victorren eta Albisuren kontra, Labriten. Ez da ezer jokoan egongo finalerdietako ligaxkako sailkapenari begira. Partida hau ere zuzenean emango dute ETB1ek eta eitb.eus webguneak, 18:00etan.

Igandeko norgehiagokari begira ez dago kalkulu handirik egin beharrik, irabazten duen bikotea sailkatuko baita apirilaren 7an Bilboko Bizkaia pilotalekuan jokatuko den final handira.