Ajax, Real Madril, Tottenham eta Dortmund, aurrera egiteko lehen pausoa ematera

Gaur jokatuko dira Txapeldunen Ligako final-zortzirenetako joaneko beste bi partida. Johan Cruyff Arenan, Ajax - Real Madril neurketa jokatuko da, eta Wembleyk hartuko du Tottenham - Borussia Dortmund norgehiagoka.

Championseko azken hiru edizioetako txapelduna den Real Madrilek Ajax izango du aurkari. Amsterdameko taldea zalantzaz beteta dator neurketa honetara, duela bi aste 6-2 galdu baitzuen Feyenoorden aurka, eta iragan asteburuan porrota jaso zuelako Heraclesen kontra (1-0). Talde espainiarrak, aldiz, bana berdindu zuen Bartzelonaren aurka Camp Nou-n, Errege Kopan, eta garaipena lortu zuen Atletico Madrilen aurka (1-3) ligan, Wanda Metropolitano estadioan.

Frenkie De Jong zalantza izan da Ajaxen, azken egunetan min hartuta ibili delako, baina jokatzeko prest egongo da, eta hasierako hamaikakoan sartuko du Ten Hag entrenatzaileak. Real Madrilen, Solari entrenatzaileak Marcos Llorente ez du prest izango, min hartuta baitago.

Asteazkeneko beste partidan, Tottenham eta Borussia Dortmund arituko dira lehian. Ingalaterrako taldeak Harry Kaneren baja garrantzitsua du, baina Premier Leagueko partidak aurrera ateratzen ari da, eta hirugarrena da sailkapenean. Bestalde, Borussia Dortmund Bundesligako liderra da, eta bost puntu ateratzen dizkio bigarren dagoen Bayern Munichi.