Zubeldiak positibo eman du covid-19an eta ezingo du Osasunaren aurka jokatu

Igor Zubeldia Realeko jokalariak positibo eman du covid-19an ostegun honetan, eta larunbatean ezingo du jokatu Osasunaren aurkako Santander Ligako azken jardunaldiko partida.

Klubak koronabirusa atzemateko probetan emaitza positibo bat egon dela jakinarazi du komunikatu baten bidez. Ondoren jakin da Zubeldiak eman duela positibo, jokalariak berak aitortu baitu Instagram sare sozialean.

"Covid-19a atzemateko proban positibo eman dudala jakinarazi nahi dizuet. Asko sentitzen dut, baina ezingo diot taldeari lagundu geratzen zaigun azken finalean. Hala ere, ziur nago helburua lortuko dugula", adierazi du Igor Zubeldiak Instagramen.

Jokalaria etxean dago, osasun egoera onean, Realak jakinarazi duenez. Ligako protokoloari jarraituz, Realeko jokalariek eta teknikariek beste proba batzuk egin beharko dituzte ostiralean. Ostegun honetako probetan, emaitza guztiek negatibo eman dute, Zubeldiarenak izan ezik.