Willian Josek berdinketa eman dio Realari Espanyolen aurka

Realak berdinketa eskuratu du Espanyolen aurka Anoetan (1-1). Piatti, 61. minutuan, eta Willian Jose, 78.an, izan dira golegileak. Espanyolek jokalari bat gutxiagorekin jokatu ditu luzapeneko minutuak, Javi Fuegok bi txartel hori ikusi dituelako.

Realak izan ditu agintea eta nagusitasuna lehen zatian, eta adi egon dira Piatti eta Leo Baptistaoren kontraerasoetan. Bi taldeetako defentsak nagusitu dira bi areetan, lehen zati hutsalean.

Bigarren zatia indar gutxirekin hasi da. Errespetu gehiegi izan diote taldeek elkarri. Juanmik gola egin du Realarentzat, baina epaileak jokoz kanpo zegoela adierazi du, zentimetro gutxirengatik, eta momentu horretan suspertu da Espanyol.

Kataluniako taldeak 61. minutuan egin du gola. Piattik, jaurtiketa bikain batekin, aurretik jarri du Espanyol, atzelari txuriurdinen akats baten ostean.

Hala ere, Realak ez ditu besoak altxatu, eta Willian Josek markagailua berdindu du beste jokaldi eder batean, Zalduaren erdiraketa buruz errematatuz.

FITXA TEKNIKOA

Reala: Rulli; Zaldua, Mikel, Iñigo Martinez, Yuri; Illarramendi, Pardo (Carlos Vela, 67. min), Zurutuza; Oyarzabal, Juanmi (Xabi Prieto, 82. min) eta Willian Jose.

Espanyol: Diego Lopez; Javi López (Roberto Duarte, 58. min), David Lopez, Oscar, Victor Sanchez; Hernan Perez (Salva Sevilla, 69. min), Roca, Javi Fuego, Piatti (Jurado, 77. min); Baptistao eta Gerard.

Golak: 0-1, 61. min: Piatti. 1-1, 78. min: Willian Jose.