Realak gehiago hurbildu nahi du Europako postuetara

Realak Europako postuetan sartzeko aukera izango du Zaragozaren aurka, Romaredan. Aragoiko taldeak puntuak bai ala bai behar ditu, jaitsiera postuetatik urruntzeko, baina txuri-urdinak sasoi onean helduko dira norgehiagokara.

Azkeneko hamabi jardunaldietako hamaika partidetan puntuak lortu dituzte Philippe Montanierren mutilek, eta gainera, Barçaren eta Valentziaren aurka garaipen ikusgarriak eskuratu dituzte.

Carlos Vela mexikarra Realaren erasoan gakoa bilakatu da, eta Donostiako taldea Ligan gol gehien lortzen dituen laugarren taldea da.

Alberto De la Bella defentsa eta Markel Bergara erdilaria hasierako hamaikakora itzuliko dira. Erasoan, Montanierrek hiru jokalari ezkerti jartzeko aukera izango du.

- Ustezko hamaikakoak:

Zaragoza: Roberto; Fernandez, Sapunaru, Alvaro, Paredes edo Pinter; Movilla, Apoño; Victor, Romaric, Montañés; eta Postiga.

Reala: Bravo; Carlos Martinez, Iñigo Martinez, Mikel Gonzalez, De la Bella; Illarramendi, Bergara, Xabi Prieto; Griezmann, Vela eta Chory Castro