Eibar-Reala eta Osasuna-Alaves, igandean EITB Median ikusgai

Igande honetan, abenduaren 8an, bi euskal derbi jokatuko dira. Alde batetik, F Ligako 12. jardunaldian, Eibar-Reala partida izango da jokoan Ipuruan, eta ETB1en eta eitb.eus-en izango da ikusgai, 12:00etan, eta bestetik, EA Sports Ligako 16. jardunaldian, Osasuna-Alaves lehia izango dugu Sadarren, 18:30ean, eta ETB2n eta eitb.eus-en ikusi ahalko da.

Emakumezkoen partidari dagokionez, bi taldeek behar dute garaipena. Eibar azken postuetan dago, eta etxean jokatzeak plus bat eman diezaioke partida irabazi eta hain beharrezkak dituen hiru puntuak eskuratzeko. Reala, berriz, sailkapeneko goiko aldean dago, eta garaipena nahi du goiko borroka horretan murgilduta jarraitzeko.

Gizonezkoen kasuan, Alavesek entrenatzaile aldaketa izan du aste honetan. Luis Garcia Plazak agur esan dio taldeari, eta Eduardo Coudetek hartu du haren postua. Aldaketa honekin, taldearen emaitzak hobetzea espero dute, argentinarraren debuta ona izan ez den arren: arabarrak Kopatik kanpo geratu ziren ostegunean, Deportiva Mineraren aurka galduta.

Bestalde, Osasuna zazpigarren dago sailkapenean, eta denboraldi ona egiten ari da. Hiru puntuak irabazi eta Europako postuetako lehian jarraitzea da gorritxoen helburua.