Sevillak eta Erromak jokatuko dute Europa Ligako finala

Erromak eta Sevillak jokatuko dute Europa Ligako finala, ostegun honetan finalerdietako itzulerako partidan aurkariak mendean hartuta. Italiarrek golik gabeko berdinketa lortuta eskuratu dute txartela Bayer Leverkusenen etxean, joanekoan sartutako golari esker, eta andaluziarrak luzapenera arte borrokatu dira berdintasuna hausten zuen gola sartzeko (2-1).

BayArenak Xabi Alonso euskaldunaren eta Jose Mourinho portugaldarraren arteko bigarren lehia hartu du. Etxeko taldeak eraso egin du etengabe partida osoan zehar, golik egin ezinik, eta bisitariek joaneko partidako 1-0eko abantaila baliatu dute finalera iristeko.

Hogei jaurtiketa baino gehiago egin ditu Bayer Leverkusenek, denak alferrikakoak, eta talde bisitariak behin bakarrik jaurti du. Partidaren amaieran, Xabi Alonsoren frustrazioa eta Jose Mourinhoren poztasuna nahasi dira berdegunean.

Beste norgehiagokan, Juventuseko Dusan Vlahovicen aurrelari serbiarraren gol batek eta Suso Fernandez sevillarraren beste batek duela astebete Turinen izan zen emaitza errepikatu dute (1-1).

90 minutu oso bizi jokatu dituzte bi taldeek, eta abagune ugari sortu dituzte, bisitariek kontraerasoan eta etxekoek aurkariaren zelaian presentzia handiagoa izanez.

Luzapena hasi eta bost minutura, Erik Lamela argentinarrak berdinketa hautsi du, markagailuan 2-1ekoa jarriz. Gol horrek maiatzaren 31n Budapesten jokatuko den Europa Ligako finalerako txartela eman dio Jose Luis Mendilibar entrenatzaileak zuzentzen duen taldeari.