Reala-Espanyol, Elx-Athletic, Badajoz-Eibar eta Huelva-Osasuna, Kopan

Astearte honetan egin den Errege Kopako final-hamaseirenetako zozketak mota guztietako kanporaketak ekarri ditu oraindik lehian jarraitzen duten lau euskal taldeentzat.

Itxuraz, zorterik makurrena Realari egokitu zaio, Lehen Mailako talde baten aurka aritu beharko baita: Espanyolen kontra, hain zuzen ere. Hori bai, txuri-urdinek etxean jokatuko dute kanporaketa, Reale Arenan.

Athletic, bere aldetik, Martinez Valero zelaira bueltatuko da, InterCityren aurka jokatutako lehen kanporaketan egin bezala, Elx gainditzeko asmoz.

Azkenik, Eibarrek eta Osasunak Bigarren B Mailako taldeak izango dituzte aurrez aurre. Armaginei dagokienez, Cacereño kanpoan utzi eta gero, Extremadurara itzuliko dira, Badajoz kanporatzeko helburuarekin. Gorritxoek, berriz, Andaluziara joko dute, Huelvako Recreativoren aurka lehiatzeko.

Kanporaketak partida bakarrera jokatuko dira datorren astean, urtarrilaren 21ean, 22an eta 23an.

Honako hauek dira 3. kanporaketako partida guztiak

Eivissa – Bartzelona

Logroñes – Valentzia

Cultural Leonesa – Atletico Madril

Salamancako Unionistas – Real Madril

Ebro – Leganes

Badajoz – Eibar

Badalona – Granada

Recreativo Huelva – Osasuna

Rayo Vallecano – Betis

Mirandes – Celta

Tenerife – Valladolid

Girona – Vila-real

Elx – Athletic Club

Zaragoza – Mallorca

Sevilla – Levante

Reala – Espanyol