Reala, Txapeldunen Ligarako postuetan; Athletic eta Osasuna, lasaiago

BBVA Ligako 29. jardunaldia jokatu eta gero, Realak Txapeldunen Ligako postuan jarraitzen du, Athletic lasaiago dago, eta Osasunak urrunago ditu jaitsiera postuak.

Txuri-urdinek puntu bat lortu zuten Espanyolen aurka (2-2), Cornellan, eta sailkapeneko laugarren postuari eutsi diote. Puntu bateko aldea du Realak Malagarekin eta bikoa Valentziarekin.

Granadaren aurka garaipen garrantzitsua lortu ostean (1-0), Athleticek hamaika puntura du jaitsiera, eta lasaitasun handiagoz ekingo dio denboraldiaren amaierari.

Osasunak, bestalde, urrezko hiru puntu lortu zituen Valladoliden (1-3), eta Celtak baino zazpi puntu gehiago ditu. Jaitsiera postuetan dauden taldeetan onenak dira galiziarrak.

Hurrengo jardunaldian, Realak Malaga hartuko du, Osasunak Espanyol, eta Athleticek Sevillaren kontra jokatuko du, Sanchez Pizjuanen.