Liderraren etxean irabazi du Osasunak

Osasunak garrantzi handiko garaipena lortu du, bigarrena jarraian, Las Palmasi 1-2 irabazita. Ez da neurketa erraza izan, baina liderra gainditu dute.

Etxeko taldea izan da nagusi hasierako minutuetan, baina gorritxoak pixkanaka-pixkanaka surpertu dira eta neurketa parekatu egin da. Las Palmasek 36. minutuan estreinatu du markagailua, Momok egindako golarekin. Erdilariak kornerretik gainditu du Santamaria atezaina. Gol ederra izan da.

Bigarren zatian markagailuari buelta eman dio Osasunak bi gol sartuta. 60.ean berdinketarena egin du Ninok Cedricken pasea baliatuta, eta zortzi minutu geroago nafarren bigarrena sartu du Mikel Merinok (1-2). Korner batean, Casto atezaina gainditu du jokalariak, buruz.

Amaierara heltzeko hamabost minuturen faltan, hamarrekin geratu da Osasuna Miguel Flañori bigarren txartel horia erakutsi baitio epaileak. Etxekoek ez dute amore eman, baina Urbanenek ondo defendatu dute.

Fitxa teknikoa:

1. UD Las Palmas: Casto; David Simón, David Garcia (Vicente Gomez, 79'), Aythami Artiles, Christian Fernandez; Hernan, Javi Castellano, Momo (Roque, 67'); Nauzet Aleman, Asdrubal eta Culio (Guzman, 64').

2. CA Osasuna: Santamaria; Sisi, David Garcia, Miguel Flaño, Cadamuro; Loe, Merino (Kenan Kodro, 74'); Cedrick (Olavide, 66'), De las Cuevas (Echaide, 79'), Roberto Torres; eta Nino.

Golak:

1-0, 36': Momo;
1-1, 60': Nino;
1-2, 69': Merino.