Elx: 'Espainiako futbolean egindako bidegabekeria handiena da'

Juan Anguix Elxeko presidenteak esan du taldea Bigarren Mailara kontu administratiboengatik jaistea "Espainiako futbolean izandako bidegabekeria handiena" dela.

"Azkenera arte borrokatuko gara", esan du presidenteak, erabakiaren aurka errekurtsoa jartzeko aukeraz galdetu diotenean.

"Ligak badaki nolako ahaleginak egin ditugun, eta atzetik geneukana. Eurekin zintzoak izan gara, eta botata utzi gaituzte", salatu du presidenteak, haserre. "Hedabideek duela hilabete zekiten erabakia hau izango zela eta programatuta zegoela. Eta nire galdera da, esku beltz bat dago? Elxekoak garelako da?", galdetu du Anguixek.

Presidenteak argi eta garbi hitz egin du: "Ligak engainatu egin gaituela sentitzen dugu. Ezin dute Elx hil, eta hori da egin dutena. Ni beti aurrez aurre joan naiz".