Eibarrek 4.000 harpidedun lortu ditu

Eibarrek 4.000 harpidedun lortu ditu, bere historian estreinakoz, Alex Aranzabal klubeko presidenteak jakinarazi duenez.

Harpidedunen %80a Eibarreko bizilagunak dira. Eibarren 27.000 lagun bizi dira, beraz biztanleriaren %12a hurbilduko da Ipuruara talde armaginaren partidak ikustera.

Lehen Mailan jokatzeko txartela lortu izanak, harpidedun izateko interesa piztu du. 2012-2013 denboraldian, taldea Bigarren B Mailan zenean, 2.500 ziren Eibarreko bazkideak. 2014. urteko maiatzerako, ordea, gora egin zuen kopuruak (3.500). Hala ere, izena emateko aukera bertan behera utzi behar izan zuen talde gipuzkoarrak, Ipuruako edukiera dela eta.

Uztailean itxaron-zerrenda zabaldu zuen Eibarrek, eta eskaerak (1000) erabilgarri zeuden txartelak (450) baino gehiago izan ziren. Gauzak horrela, zozketa egin behar izan zuten.