Athleticek aurpegia eman du Manchesterren, baina berriro galdu du eta San Mamesko finalik gabe geratu da (4-1)

Athleticek ezin izan du miraria gauzatu Old Trafforden ostegun honetan, Europa Ligako finalerdietako itzulikoan. Partidako zati handi batean nagusi izan arren, eta Jauregizarren gol ikusgarri batekin aurrea hartu, Manchester Unitedek buelta eman dio markagailuari hamar minututan, zuri-gorriak etxeko finalik gabe utziz.

Williams anaiak eta Sancet baja garrantzitsuak izan diren arren, 'lehoiek' oso ondo hasi dute partida, zelaian ondo kokatuta eta ekimena eramanez jokoan. Ingalaterrako taldeak nahiago izan du atzean sartzea emaitzari eusteko, eta hori oso ondo etorri zaie euskaldunei aukerak sortzeko.

Zortzi minutura, Unai Gomezek baloia lapurtu du eta Berenguerri atzera pasea eman dio, baina ez da fin ibili eta gora bidali du baloia. Athleticen 7ak zortea probatu du kontraeraso azkar batean ere urruneko jaurtiketa batekin, baina kanpora joan zaio berriro, ezkerretik.

1:42

Manchester United vs Athletic Europa Ligako finalaurrekoetako partidako laburpena eta golak (4-1)

Uniteden abagune batean, Dorgu area barruan erori da, Yerayrekin baloiagatik borrokatu ostean, eta penaltia eskatu dute, baina, VARean berrikusi ondoren, epaileak ez du ezer adierazi. Denborak aurrera egin ahala, etxekoek aurrerapausoa eman dute eta min egiten saiatu dira jokaldi azkarrekin, baina zuri-gorriek nagusi izaten jarraitu dute.

Aurkarien irteera kaskar batean, Djalok area kanpotik jaurti eta defentsan jo du, baina Jauregizarrek aldaratzea hartu du eta area kanpotik gol ikusgarria sartu du, eskuadratik (0-1).

Atsedenaldira joan aurretik, Garnachok markagailua berdindu ahal izan du Agirrezabalaren aurrean bakarrik geratuta, baina jaurtiketa kanpora joan zaio.

Bigarren zatian Athleticek erritmo bizi berarekin jarraitu du. Erdiraketen bidez, aurkariaren area erasotzen jarraitu du, baina azken errematea falta izan zaio, neurri batean Unitedek talde erdia zuelako arean defendatzen.

Valverdek freskotasuna bilatu du zelaian eta De Marcos, Prados, Guruzeta eta Olabarrieta sartu ditu Djaloren, Gorosabelen, Unai Gomezen eta Galarretaren ordez.

Athleticen hurrengo aukera falta batetik etorri da. Nuñezek buruz errematatu du bigarren zutoinaren bila, baina kanpora joan da oso gutxigatik.

72. minutuan, Mountek baloia area barruan jaso, biratu eta Agirrezabala gainditu du bigarren zutoinetik, partida berdinduz (1-1). Eta ia jarraian, Casemirok markagailua irauli du burukada batekin (2-1).

Azken minutuetan, Hojlundek eta Mountek erabakita utzi dute kanporaketa, dena eman duen Athleticentzat emaitza bidegabea utziz (4-1).

Fitxa teknikoa:

4 - Manchester United: Onana; Mazraoui (Shaw, 62. min), Lindelof (Amass, 81. min), Maguire, Yoro, Dorgu; Ugarte (Mount, 62. min), Casemiro (Mainoo, 82. min); Fernandes, Garnacho (Diallo, 62. min) eta Hojlund.

1 - Athletic Club: Agirrezabala; Gorosabel (De Marcos, 62. min), Yeray, Unai Nuñez, Yuri; Galarreta (Prados, 62. min), Vesga, 74. min), Jauregizar; Djalo (Olabarrieta, 62. min), Unai Gomez (Guruzeta, 67. min), Berenguer; eta Sannadi.

Golak: 0-1. Jauregizar, 31. min, 1-1. Mount, 72. min, 2-1, Casemiro, 80. min, 3-1. Hojlund, 87. min eta 4-1. Mount, 91. min.

Epailea: Daniel Siebert (Alemania). Txartel horia atera die Mazraoui, Casemiro, Dorgu, Jauregizar, Nuñez, Berenguer eta Sannadi jokalariei.