Susaetak Athletici garaipena eman dio Wroclawn

Slask Wroclaw: Gikiewicz; Grodzicki, Wasiluk, Spahic, Juraszek; Mencel, Stevanovic, Garyga (Tetlak, 83. minutua), Patejuk; Cristian Diaz (Kubiak, 86. minutua) eta Voskamp (Sirkoski, 83. minutua).

Athletic: Raul; Iraola (Markel Etxeberria, 62. minutua), Ramalho, Aurtenetxe, Castillo; Gurpegi (Iturraspe, 46. minutua), Galarreta; Susaeta, Igor Martinez (De Marcos, 46. minutua), Iñigo Perez (Ismael Lopez, 46. minutua); eta Toquero.

Gola: 0-1, 42. minutua: Susaeta.

Markel Susaetak atsedenaldia baino lehen gola sartu eta Athletici garaipena eman dio Wroclawko (Polonia) Polish Masterseko bigarren partidan. Zuri-gorriek Slask Wroclaw etxeko taldea 0-1 hartu dute mendean.

Denboraldiaurreko bigarren garaipena lortu dute Bielsaren jokalariek. Neurketa kontrolpean izan du Athleticek, baina atea aurrean ez du asmatu eta aldea ezin izan du handitu.

Adurizen lesioak eta Ekizaren eta Ibai Gomezen arazo fisikoek aldaketak egitera behartu dute. Horrela, Marcelo Bielsak Gurpegi, Iñigo Perez eta Toquero hasierako hamaikakoan berdeguneratu ditu. Hiru jokalariek bi neurketa 24 orduren buruan jokatu behar izan dituzte.

Susaetak norgehiagokako gol bakarra sartu du. Castillok bigarren zutoinera egindako erdiraketa bikaina aprobetxatu du eibartarrak. Iñigo Perezek baloia pasatzen utzi eta Susaetak baloia sareetan kokatu du.

Atsedenaldiaren ostean partida bizitu da. Slask taldeak erasora jo du eta Raulek berdinketa bi aldiz saihestu du. Petejuken (50. minutua) jaurtiketa desbideratu du Athleticeko atezainak eta ondoren Markel Etxeberria taldekidearen aldaratzea ate azpitik atera du.