Bajek ahulduta iritsiko da Bartzelona San Mamesera

Bartzelonak baja garrantzitsuak dituela etorriko da San Mamesera, abenduaren 1ean Athleticen aurka jokatu behar duen partidarako (21:00). 'Tata' Martino entrenatzaileak ezin izango ditu Leo Messi surrelaria eta Victor Valdes atezaina erabili, eta litekeena da Dani Alvesek ere jokatzeko arazoak izatea. Horiez gain, Jordi Alba, Tello eta Affelay ere min hartuta daude.

Leo Messi argentinarra min hartuta dago eta sei eta zortzi aste behar ditu sendatzeko. Urrezko baloiak haustura du ezker zangoko giharrean.

Aurrelaria hirugarrenez lesionatu da udatik hona. Errekuperazioaren lehen zatia Bartzelonan egingo du, eta bigarrena, aldiz, Buenos Airesen.

Jokalariak Betisen aurkako partidan min hartu zuen, 19. minutuan.

Valdes, sei aste bajan

Victor Valdes Bartzelonako atezainak sei aste inguru emango ditu bajan, eskuineko zangoan duen lesioaren ondorioz.

Valdes Hegoafrika - Espainia lagunarteko partidan lesionatu zen.

Dani Alves, zalantzan

Athleticen aurkako partidari begira, hirugarren baja bat ere izan dezake Bartzelonak; Dani Alvesena, alegia. Atzelari brasildarrak astebete eta 10 egun artean beharko ditu eskuineko zangoan duen haustura txiki bat sendatzeko.

Gauzak horrela, litekeena da Bartzelonak ondorengo hamaikakoa zelairatzea: Pinto; Montoya, Bartra, Piqué, Adriano; Busquets, Xavi, Iniesta; Alexis, Cesc Fábregas, Neymar.