Alavesek Pellistri fitxatu du Manchester Unitedetik, utzita

Alavesek igande honetan jakinarazi duenez, Facundo Pellistri uruguaitarra fitxatu du utzita denboraldia amaitu arte, Manchester United talde ingelesetik.

Tomas Tavares portugaldarra joan izanak eskuin hegalerako jokalari bat bilatzera behartu du klub babazorroa, taldearen soldata muga oztopatuko ez duena, eta profil hori betetzen du Hegoamerikako 19 urteko erasoko hegalekoak.

Etorkizun oparoa aurreikusten zaion jokalaria Montevideoko (Uruguai) Peñarol taldeko azpiko kategorietan hazitakoa da, eta joan zen udan Europara egin zuen jauzi. Manchester Unitedek 8,5 milioi euro ordaindu zituen berarengatik.

Fitxaketa horren ostean, ez da espero mugimendu gehiagorik egotea Gasteizko taldean neguko merkatuaren azken txanpan, beste irteerarik egin ezean, kirol zuzendaritzak azaldu zuenez.