Zuazo Barakaldok garaipen garrantzitsua lortu du Beti-Onak taldearen etxean (24-26)

Zuazo Barakaldo 24-26 gailendu zaio Replasa Beti-Onak taldeari larunbat arratsaldean Atarrabiako kiroldegian jokatu duten Guerreras Iberdrola Ligako 19. jardunaldiko partidan. Bizkaiko taldeak bigarren garaipena lortu du jarraian, sailkapeneko azken postuan segitzen badu ere.

Zuazo Barakaldo hasieratik jarri da aurretik markagailuan, baina lehia oso estua izan da, eta Beti-Onakek ez dio zuloa egiten utzi. Horrenbestez, 12-14ko emaitzarekin joan dira atsedenaldira.

Bigarren zatian, etxeko taldeak aurrerapausoa eman du, eta lehen laurdenerako emaitza irauli du: 18-17. Hala ere, Zuazo ez da kikildu. Partidan sartuta jarraitu du, eta azken txanpan markagailuari buelta eman dio; 24-26 nagusitu dira azkenean.

Barakaldoko taldeak zuloan sartuta segitzen du. Alabaina, bigarren garaipena lortu du jarraian Ligan, eta horrek indarra emango dio mailari eusteko borrokan segitzeko.

Beti-Onak, berriz, bolada txarrari amaiera eman ezinik dabil, ondo lehiatu arren, eta sailkapeneko bederatzigarren tokian dago.