Denboraldi amaieran Bidasoa utzi eta erretiroa hartuko duela iragarri du Ander Ugartek

Bidasoa Irungo Ander Ugarte piboteak kluba eta eskubaloia utziko ditu 2022-23 denboraldiaren amaieran, jokalariak eta Bidasoak berak asteazkenean iragarri dutenez. Ugartek 291 partida jokatu ditu orain arte ASOBAL Ligan, eta sei taldetan ibili da, tartean Bidasoan. Irungo klubean hasi zen jokatzen, eta bertan amaituko du kirol ibilbidea, 33 urterekin. Guztira, 794 gol sartu ditu.

Gazte eta junior mailatan Espainiako selekzioarekin internazionala izan ostean, irundarra talde hauetan aritu da: Bidasoa, Valladolid, Anaitasuna, Huesca, Antequera eta Ademar. Jokalariak jendaurrean eskertu du bere ibilbidean jasotako babesa, eta oraindik jokatzen emango dituen hurrengo hilabeteetan, "bigarren itzuli zirraragarria" egitea espero duela erantsi du; esan duenez, "dena" emango du "helburuak lortzeko eta taldea gorenera eramaten saiatzeko".

Ugarterekin batera, Julen Aginagaldek ere utziko du eskubaloia; aurten azken urtea du jokalari gisa, eta, gainera, Bidasoa taldeko kirol zuzendaria da.