Gurbindo, Peciña, Odriozola eta Hernandez Europako Txapelketako finalean izango dira

Espainiako selekzioak 29-25 irabazi dio Danimarkakoari Europako Eskubaloi Txapelketako lehen finalerdian, eta, hartara, txapelketa horretan lau final jarraian jokatuko dituen lehen selekzioa bihurtu da.

Jordi Riberaren mutilek defentsako lanari eutsi diote lehen zatian, eta erakustaldia eman dute atsedenaldiaren ostean Budapest Arenan. Gonzalo Perez de Vargas Niklas Landin daniarra baino gehiago izan da atezain bikainen arteko norgehiagokan, eta Aleix Gomezek (11 gol) berriz, izugarrizko neurketa jokatu bai erasoan (11 gol) zein defentsako lanean.

Iaz, Munduko Txapelketako zein Olinpiar Jokoetako finalerdietan danimarkarren aurka galdu ondoren, berriro ere euren mamuen aurrean zeudela uste izan dute Espainiako jokalariek lehiaren hasieran, Landinen eta Mikkel Hansenen eraginkortasuna ikusita.

Aitzitik, atsedenaldirako asko parekatu da partida (13-14), eta aldageletatik bueltan, jaun eta jabe izan dira Jordi Riberarenak, Gurbindo iruindarraren eta Peciña irundarraren parte hartzearekin. Ondorioz, 18:00etatik aurrera jokatuko den igandeko finalean izango dira, Suediaren aurka. Suediarrek 33-34 irabazi diete egungo txapeldun olinpikoei bigarren finalerdian.

Fitxa teknikoa:

29 - Espainia: Pérez de Vargas (P), Corrales (P); Gurbindo, Peciña, Maqueda (2), Fernández (1), Figueras (3), Cañellas (7), Casado (3), Sarmiento, García, Gómez (11), Ariño (1), Guardiola, Tarrafeta (1), Sánchez-Migallón, Márquez, Sarmiento eta Odriozola.

25 - Danimarka: Landin (P), Moeller (P), Green (P), Andersson, Antonsen, M.Hansen (8), Gidsel (3), Lauge Schmidt (2), Hald Jensen (1), M.Hansen (3), Holm (1), Jakobsen, Saugstrup, Kirkeloekke, Lindberg, Mensah Larsen (1), Mensing, Moellgard, M. Landin (4), Svan (2) eta Toft Hansen.

Emaitza bost minuturik behin: 0-1, 2-3, 4-5, 5-8, 8-11, 13-14 --atsedenaldia--, 15-15, 16-16, 21-19, 23-21, 25-23, 29-25.

Epaileak: Nikolov eta Nachevski (Mazedonia). Bi minutuz kaleratu dituzten jokalariak: Gurbindo, Peciña, Maqueda eta Figueras (Espainia); Landin, M. Landin eta Jakobsen (Danimarka).