Joxe Ramon Bengoetxea: "Hiru hautagai nagusien artean Europako gaien inguruan antzeko ikuspegia dago"

16 urtez izan da Angela Merkel Alemaniako kantzilerra eta Europar Batasuneko azken urteetako erabakietan gehien eragin duen agintaria. Bere kargu uzteak, "aro baten itxiera" irudikatuko duelakoan dago Joxe Ramon Bengoetxea EHUko Zuzenbide irakasle eta Europar gaietako aditua. Goiz Kronikan adierazi du "eztabaidaezina dela, Merkelek eragin duela Europar Batasunaren norabidea azken urteotan" eta "behar bada mundu mailakoa ere bai". Hala ere, Merkelena "lidergo leun eta isila izan dela" zehaztu du, "lortzen zituen akordioak, gehienetan kasu zailen ingurukoak (Greziako finantza krisian adibidez)" izan direla gaineratuz. 

Hiru dira Angela Merkelen ondorengo izateko hautagai nagusiak; CDU, sozialistak eta berdeak. Eskuin muturra kenduta, gainerakoen artean Europarekiko jarrerak  ez ditu oso ezberdinak ikusten: "esango nuke kontsentsu zabala dagoela".

Ekonomi gaietan, eta 2008ko krisiaren ostean, Merkelek erakutsitako zorroztasuna baretu den arren, esparru horretan zer aurreikusten duen ere galdetu zaio. Europako Banku Zentralean Draghi zegoenean, malgutu zen Alemaniak erakutsitako jarrera zorrotz eta gogor, baina Bengoetxearen ustez , "malgutze horrek eman ditu bere fruituak eta Alemaniako klase politikoak hori ikusi duela" azaldu du. 

Migrazioaren arloa, bestalde, "patata beroa" dela adierazi du "kudeatzen zaila" izango delakoan.  "Gai sakona eta zaila da baina Europa mailako itun orokor bat eskatzen duena". 

Bihartik aurrerako koalizioen inguruan ere egin diogu galdera eta "konbinazio posible ezberdinak" daudela irizten dio, aukera posibleak baztertu gabe. Aurrera begira jarrita, gainera, "inportantea izango dela Alemaniako aulkian nor izango den, Europako Triunbiratoa funtzionatzeko gai izan dadin."