"Ikusten nuen desgrazia bat gertatuko zela. Alaba salatu egin nuen Diputazioak har zezan bere zaintza"

Gero eta etxe gehiagotan ari da nerabeekin elkarbizitza gaiztotzen eta gero eta gehiago dira euren seme-alaben hazkuntza-hezkuntzarekin ezin eta gizarte zerbitzuetan laguntza eskatzen duten gurasoak. Leire da horietako bat. Oso bide zail batek eraman ditu egoera horretara. Familia historia korapilatua, banaketa zail bat eta nerabezaroaren hasiera. Arazoak hasi orduko hasi zen ama hau laguntza eskatzen ikastetxean, oinarrizko zerbitzuetan... baina, lapurretak, mehatxuak eta erasoak etorri zirenean alaba salatzea erabaki zuen. Modu latz horrekin behartu nahi izan zuen egoera, Diputazioak alaba egoitza batera eraman zezan.

Beste ama batek, berriz, semearen kasua kontatu digu: buruko osasun arazoak zituen txikitatik eta 12 urterekin drogak kontsumitzen hasi zen. Atxiloketak eta epaibideak hasi zirenean eskatu behar izan zuen laguntza.

Erne Unzurrunzagak urte asko egin ditu familiekin eskuhartzen. Gaur egun, Trebatu programako arduraduna da. Maite Carcamok, berriz, familien kasuak hartzen ditu Diputazioan. Adierazi digute gero eta kasu gehiago izateaz gain, kasuak gero eta katramilatuagoak daudela eta ez dagoela irtenbide ez errazik, ez motzik. Tabuak haustearen beharraz hitz egin digute. Azpimarratzen dute gizarteak begiratu beharra diola errealitate horri. Eta begiratu behar diola epaitu gabe.

Belen Larrion Haurren Babeserako Zuzendariak, azkenik, adierazi du gero eta gehiago hazten ari den errealitate horri, baliabide berriekin ez baizik, baliabide horiek berrantolatuta erantzun behar zaiola.