MacPherson: "Londresek ezin du bigarren independentzia erreferenduma eragotzi"

"Super osteguna" Britainia Handian. Parlamentu nazionalak berrituko dituzte Eskozian eta Galesen, eta udal erakundeak Ingalaterran. Brexit osteko lehen bozak dira, eta estatu britainiarraren batasuna eta oinarriak daude jokoan. Eskozian, erreferendum berria agindu du SNPk, eta Galesen inoizko babesik handiena du independentismoak. Baina Boris Johnson Erresuma Batuko lehen ministroak  argi esan du ez duela galdeketarik baimenduko.

"Faktoria"n, Eskoziako egoera politikoa eta independentsmoaren etorkizuna aztertu ditugu Ben MacPherson SNPren hautagai eta jarduneko Finantza Publikoetako ministro eskoziarrarekin. Boto-kutxetan gehiengoa lortuz gero, erreferenduma antolatuko dutela azaldu du, baina osasun-krisia lehenetsiz:  “Ezer baino lehen, SNPren gobernuak lehentasunezkotzat joko du pandemiari aurre egitea. Eta unea iristen denean, independentziari buruzko erreferenduma nahi dugu, legealdi honetan bertan, Eskoziako herritarrek bere etorkizunaz erabaki dezaten”. Nabarmendu duenez, gobernu britainiarrari galdeketea ahalbidetzea dagokio, Erresuma Batua "kontsentsu-batasuna" delako.

Sturgeon vs Salmond

Inkesten arabera, Nicola Sturgeonek jarraituko du Eskoziako ministro nagusi karguan, eta Nere Arruti Aberdeengo Unibertsitateko irakasle ohiak azaldu duenez, bera da SNPren arrakastaren "giltza": "pandemia pedagotiatik eta enpatiatik kudeatu du, hanka sartu duenean barkamena eskatu du eta jendeak errespetua dio". Aurrez aurre du boto paperetan Alex Salmond bere aurrekoa: "Salmond dinosauro txikia da, zonbie bat, eta Sturgeonen etsai intimoa, Arzalluz Garaikoetxeari zitzaiona". Sexu-abusuei lotutako akusazioen ondotik, akabatuta ikusten dute Salmond.

Eskoziako barne-politikatik Europara egin dugu jauzi. Eta balizko Eskozia independente batek Europako Batasunera itzultzeko bide politiko eta juridikoa aztetu dugu Joxerramon Bengoetxea Zuzenbide doktorearekin eta Mikel Reparazekin.