Kongresuaren Mahaiak onartu du Sanchezek konfiantza galdea egin dezan Juntsek aurkeztu zuen proposamena

Espainiako Diputatuen Kongresuaren Mahaiak tramitera onartu du Sanchezek konfiantza galdea egin dezan Junstek aurkeztutako legez besteko proposamena. Aurreikuspenen arabera, otsailaren 25eko edo martxoaren 11ko osoko bilkuran eztabaidatuko da.

PSOEk Junts alderdiarekin lorturiko akordioaren baitan kokatzen da gaurko erabakia. Trukean, Juntsek "ezkutu sozialeko ia neurri guztiak" jasoko dituen Espainiako Gobernuaren dekretua (omnibus dekretuaren ordezkoa) babestuko du. 

Kongresuko iturriek jakinarazi dutenez, oraindik ez dago argi Juntsen legez besteko proposamena noiz eztabaidatuko den. Bi data daude mahai gainean: otsailaren 25a eta martxoaren 11.

Gaurkoaren aurretik, Kongresuaren Mahaiak birritan atzeratu du Juntsen proposamena tramitera onartu ala ez erabakitzea. 

Edozein kasutan, Espainiako gobernuburuak soilik du konfiantza galdea batera deitzeko ahalmena, eta dagoeneko esana du "ez duela beharrik ikusten".