Valentziak errekuperaziorako presidenteordetza bat izango du, eta larrialdietarako kontseilaritza berri bat

Carlos Mazon Generalitateko presidenteak iragarri duenez, "susperraldi ekonomiko eta sozialerako presidenteordetza" bat eta Larrialdi eta Barne Kontseilaritza bat sortuko dituzte, urriaren 29ko goi-geruzetako depresio isolatuaren osteko berreraikuntzari aurre egiteko eta hondamendien aurreko prebentzioa indartzeko.

Valentziako Gorteetan goi-geruzetako depresio isolatuaren kudeaketaren berri emateko egin duen agerraldiaren hasierako diskurtsoa bukatzean egin du iragarpena Mazonek, baina ez du sail horietan arituko diren pertsonen izenik eman, eta ez du zehaztu noiz ekingo dion birmoldaketari.

"Gobernu egitura berri bat" sortuko dutela aurreratu du, "susperraldirako kontseilaritza bat, susperraldi sozial eta ekonomikoa Valentziako Erkidegoko txoko guztietara iritsiko dela ziurtatzeko asmo argi eta sendoarekin sortua".

Azaldu duenez, egitura "dinamikoa, modernoa eta eraginkorra" izango da, presidenteordetza berria buru izango duena, eta kontseilaritza guztiak koordinatuko ditu berreraikitze neurrietan.

Gainera, Larrialdi eta Barne Kontseilaritza berriak (orain arte Justizia eta Barne Kontseilaritzak) arriskuak aztertuko ditu eta "osasun larrialdien eta hondamendi naturalen" protokoloak ezarriko ditu. Herritarren kontzientziazio handiagoa ere bilatuko du.

Carlos Mazonek, Valentziako Generalitateko presidente kargua hartzean, Uholde Arriskuak Kudeatzeko Mandatariaren Bulegoa kentzeko erabakia hartu zuen, eta neurri horrek eztabaida handia sortu du, bereziki Valentziako Erkidegoan gertatutakoa ikusi ostean.

Generalitatearen aurreko gobernuak sortu zuen bulego hori, Valentziako Alderdi Sozialistako Ximo Puigek gidatuta. Uholde-arriskuen prebentzioa eta kudeaketa koordinatzea zuen helburu, horrelako fenomeno meteorologikoen aurrean bereziki kaltebera den eskualde batean, Valentziako itsasertzean, adibidez.

Uholdeen ondorioak arintzeko estrategiak eta planak garatzeko, hainbat erakunde eta udalerrirekin koordinatzeko eta arrisku handiko eremuak babestuko zituzten azpiegiturak sustatzeko helburua zuen.