Hezkuntza Sailak % 30 igoko ditu zuzendaritza-taldeak osatzen dituzten irakasleen lansari-gehigarriak

Hezkuntza Sailak % 30 igoko ditu, oro har, ikastetxe publikoetako zuzendaritza-taldeak osatzen dituzten irakasleen lansari-gehigarriak. Gaur egun, 2.000 irakasle inguruk jasotzen dituzte pizgarri horiek.

Hori da Hezkuntza sailburuak, Begoña Pedrosak, iragarri duen berrikuntzetako bat sailaren 2025erako aurrekontuen aurkezpenean. Aurrekontu horiek 3.247,5 milioi izango dituzte, Eusko Jaurlaritzaren bigarren handiena, osasungintzaren atzetik, eta 121,6 milioi hazi dira, aurten baino % 3,9 gehiago.

Langileen kapitulua Sailaren partidarik garrantzitsuena da (guztizkoaren % 55), eta 52 milioitan hazi da, 1.793,2 milioiraino, hau da, % 3ko igoera izango du.

Partidak barne hartzen ditu ordainsari-politikan hitz emandakoak (sinatutako akordioak) ikastetxeetako langileekin, bai sare publikokoekin, bai itunpeko sarekoekin. Gainera, langileen egonkortasuna sendotzearen alde egingo da; izan ere, ikasturte 756 langile gehiagorekin hasi da.

Itunpeko pribatuari laguntzeagatik oposizioak egindako kritiken aurrean, sailburuak erantzun du gobernuak euskal eskola publikoaren alde egindako ahalegina "oso argia" dela. Horren erakusgarri, iragarri du otsailerako Euskal Eskola Publikoa Eraldatzeko eta Hobetzeko I. Plan Estrategikoa prest egongo dela.