Rubalcabak 'arduragabekeriaz jokatzea' egotzi dio Artur Masi

Alfredo Perez Rubalcaba PSOEko idazkari nagusiak "arduragabekeria apartaz jokatzea" egotzi dio gaur Artur Mas Kataluniako Generalitateko presidenteari, independentziaren inguruko erreferenduma "legezkoa izan edo ez" deituko duela iragartzeagatik.

Buruzagi sozialistaren hitzetan, "agintari batek argi izan behar du bere esparrua legeak direla", eta, beraz, Masen iragarpena "aurrekaririk gabekoa" da.

Nolanahi ere, Rubalcabak ez du uste azkenean kontsulta egingo dutenik.

PSOEko idazkari nagusia "Boulevard" Radio Euskadiko saioan izan da gaur goizean, eta, bertan, atzo Kataluniako Parlamentuak onartutako kontsulta proiektua hartu du hizpide, besteak beste.

Hori horrela, "Katalunian nahaste hau sortzen ari zen bitartean", Artur Masekin "murrizketez" baino ez hitz egitea leporatu dio Mariano Rajoy Espainiako Gobernuko presidenteari. "Biak arduragabeak dira", nabarmendu du.

AURREKONTUAK

Bestalde, atzo Ministroen Kontseiluak onartutako Aurrekontuak ez direla "sinesgarriak" iritzi dio Rubalcabak, eta "langabezia gehiago" sortuko dutela salatu du.

"Atzerrian sinesgarritasuna lortu behar bada, ezin dira zientzia-fikzioko Aurrekontu batzuk aurkeztu", deitoratu du.

Rubalcabaren esanetan, Aurrekontu hauekin "gutxiago dutenek gehiago ordaintzen jarraituko dute", eta Gobernuak "ahaztu" egin du hazkundea sustatzea.