EAJk eta PSE-EEk Maduroren Gobernuaren "abusuak" salatu dituzte, eta hauteskunde-aktak publikatzea exijitu

Eusko Legebiltzarrak ohiko jardunari heldu dio gaur, XIII. Legegintzaldiko aurreneko osoko bilkura eginda. Ganbera martxan dago maiatzetik, baina azken eztabaida otsailean egin zuen, artean aurreko legegintzaldia indarrean zela.

Saioa 09:30ean hasi da, hainbat izapide. Aurrena, EAEren senatari ordezkariak hautatu dituzte; ondoren, sei legebiltzarkide sozialisten inguruko Bateraezintasunen Batzordearen irizpena aztertuko da. Azkenik, Gogora institutuaren Zuzendaritza Kontseiluko kideak izendatu dituzte.

Behin horiek eginda, eztabaidari ekin diete taldeek, eta Venezuelara begira jarri da Ganbera, Jaurlaritzako bi bazkideek, EAJk eta PSE-EEk, elkarrekin aurkeztu duten legez besteko proposamena tarteko. Bi taldeek "kezka" agertu dute "Presidenterako hauteskundeen ondoren, Venezuelan dagoen egoeragatik, gero eta atxiloketa arbitrario gehiago eta oposizioaren aurkako etengabeko jazarpena direla eta". Horren aurrean, "errepresio edo jazarpen berehala bertan behera uzteko" eskatuko diote Maduroren Gobernuari eta hauteskunde emaitzen aktak argitaratzeko. Era berean, Jaurlaritzari, Espainiako Gobernuari eta Europar Batasunari galde egingo diete herrialde horretan "demokrazia eta bakea babesten jarraitzea". Jeltzaleek eta sozialistek ez dute idatzian jaso Edmundo Gonzalez Venezuelako presidente hautatu gisa aitortzea, eta Venezuelan irailaren 14az geroztik atxilotuta dauden bi bilbotarrei ere ez zaie aipamenik egiten.

Jorge Juez legebiltzarkidea izan da hitza hartzen lehena, Euskal Sozialistak taldearen izenean. Aretora saioa jarraitzera joan den venezuelar taldeari diosala egin ondotik, 60ko eta 70eko hamarkadetan Venezuelak "esku zabalik" hartu zituen milaka euskal herritarrak gogora ekarriz hasi du bere hitzartzea. Nabarmendu du Venezuelako krisia bideratzeko "diplomaziaren esku-hartzea" ezinbestekoa dela, eta "elkarrizketa" aldarrikatu du. Halaber, Venezuelako Gobernuak egindako "atxiloketa arbitrarioak" salatu ditu eta "preso politikoak askatzea" eskatu du, tartean, bi bilbotarrak.

Ondoren, Eusko Abertzaleak taldeko Mikel Arruabarrenaren txanda izan da. Legebiltzarkide jeltzaleak Venezuelan bizi duten "diktadura beldurgarria" salatu du, eta zentzu horretan, EH Bilduk gaiaren inguruan duen "jarrerak harridura" eragiten diola esan du. Besteak beste, "Maduroren diktadura zuritzea" egotzi dio ezker abertzaleko koalizioari. "Gaur hemen dagoen legebiltzarkide batek Maduro zoriondu zuen, eta oposizioa eskuin muturrekotzat jo. Maduroren diktaduraren zuriketaren konplizea da EH Bildu".

Bere aldetik, Igor Zulaika EH Bilduko legebiltzarkideak azaldu du "sorpresaz" hartu dutela lehen eztabaida hau Venezuelari buruzkoa izatea, "herri honek beste hainbat gai batzuk ere badituenean". Etxebizitza, soldatak, zaintza edota Osakidetza aipatu ditu. Venezuelak bizi duen "egoera zaila" ukatu gabe, adierazi du "Venezuelako herriari" dagokiola "elkarrizketaren bidez egoera bideratzea", "kanpoko esku-hartzerik gabe". "Gatazka sustatzeak egoera are gehiago zailtzen du", erantsi du. Koalizioak osoko zuzenketa aurkeztu dio proposamenari. 

Laura Garrido PPko legebiltzarkideak, berriz, iritzi dio "motz" geratu dela legez besteko proposamena, eta bi gai gehitzea ahaztu zaiela esan die jeltzaleei eta sozialistei; bi bilbotarren askapena eskatzea eta Edmundo Gonzalez Venezuelako presidente hautatu aitortzea. Gogor kritikatu du EAJren jarrera, Espainiako Diputatuen Kongresuan onartutakoa ez duelako Eusko Legebiltzarrera eraman. Osoko zuzenketa aurkeztu dute popularrek ere. 

Bere hitzaldian, Jon Hernandez Sumarreko ordezkariak legez besteko proposamena kritikatu du, bere hitzetan, PPri eta Voxi "hauspoa emateko" baino ez duelako balioko ekimenak, bi alderdi horiek Venezuelari buruz egiten ari diren "erabilera partidistan".

Azkenik, Voxeko Amaia Martinezek ere EAJren eta PSE-EEren gogor kritikatu du, "ez duelako Venezuelako egoera ondo azaltzen". Testuingurua falta dela esan du, "egungo egoera" bakarrik hartzen duelako kontuan, eta "duela hainbat hamarkadetatik Venezuelan ezarrita dagoen erregimena" ez duelako aipatzen.

Venezuelarren elkarteak, zatituta

0:39

Euskadiko venezuelarren elkarteak zatituta agertu dira Legebiltzarrean