Politika
Puigdemonten ihesa
Mossoek uko egin zioten Puigdemont atxilotzeko eskainitako laguntzari, Barne Ministerioaren arabera
Agentziak | EITB Media
Pablo Llarena Auzitegi Goreneko epaileak eskatutako azalpenak eman ditu gaur Fernando Marlaska buru duen Sailak. Zehaztu duenez, behin Puigdemont ihes egin zuela jakitean, jarri zituzten martxan hura topatzeko eta atxilotzeko "aparteko baliabideak".
-
Carles Puigdemont Generalitateko presidente ohia Bartzelonan, iragan astean. Argazkia: EFE
Carles Puigdemonten ihesaren harira, Espainiako Barne Ministerioak Pablo Llarena epaileari erantzun dio Esquadra Mossoek uko egin ziotela Puigdemont atxilotzeko Barne Ministerioak eskainitako laguntzari.
Pablo Llarena Kataluniako prozesuaren auzian instrukzioa egin zuen epaileak txosten bana eskatu zien Barne Ministerioari eta Esquadra Mossoei, Puigdemont atxilotzeko planifikatutako polizia operatiboaren inguruan eta haren "porrota" eragin zuten elementuei buruz. Horri lotuta, Espainiako Barne Ministerioak gaur jakinarazi du igorri diola operatiboari buruzko informazio guztia.
Horren arabera, azaldu duenez, Polizia Nazionalak eta Guardia Zibilak ez zuten Generalitateko presidente ohia "antzeman" Frantziako mugan ezarritako kontroletan, eta hura atxilotzea izan dela eta izango dela helburua.
Barne Ministerioak igorritako txostenaren arabera, Puigdemont atxilotzea polizia unitate guztien helburua "izan da, da eta izango da" harik eta lortzen duten arte.
Halaber, Puigdemont atxilotzeko dispositibo espezifiko eta bereziaren berri eman zion Kataluniako Poliziak Fernando Grande-Marlaska buru duen Barne Ministerioari.
Espainiako Barne Ministerioak nabarmendu duenez, abuztuaren 8aren aurreko egunetan Polizia Nazionalak eta Guardia Zibilak kontrolak jarri zituzten mugetan, portuetan, aireportuetan eta Katalunia osoan, batez ere Bartzelonako metropoliaren eragin eremuan.
Bestalde, Barne Ministerioak Llarena epaileari gogorarazi dio Europar Batasunaren Tratatuaren 67. artikuluak pertsonen joan-etorria kontrolak ez egitea bermatzen duela, beraien nazionalitatea edozein dela ere. Gaineratu duenez, muga horiek zaildu egiten dute polizia kontrolen eraginkortasuna, aurretiazko informazioa edo jarraipenerako legezko gailuak izanda ere.
