Sanchezek neurriak adostea eskaini du, hedabideen jabetzan eta finantziazioan gardentasun handiagoa izateko

Pedro Sanchez Espainiako Gobernuko presidenteak talde parlamentario guztiei, Vox ultraeskuineko alderdiari izan ezik, hedabideen gardentasuna, independentzia eta aniztasuna bermatzen lagunduko duten hainbat neurri adostea eskaini die, herritarrei "egiazko informazioa" bermatzeko.

Diputatuen Kongresuko osoko bilkuran, Sanchezek esan du egin behar dena dela Espainiako legedian sartzea duela hilabete batzuk Euroganberan onartutako komunikabideen Europako araudiak eskatzen duena, talde parlamentario guztien babesarekin, baita PPren babesarekin ere; hori bai, ultraeskuinaren babesarekin izan ezik. "Estrasburgon bozkatzen dena Espainian onartu daiteke", gaineratu du.

Horren harira, araudi horren arabera, "herritarrek komunikabideen finantziazio iturriak, akziodunen izenak eta audientzia kopuruak zintzoki ezagutu behar dituzte, gure demokraziako gobernuen publizitate inbertsioan iruzurrak eta atzerriko aktoreen esku-hartzea saihesteko, adibidez, bot edo clickbaitak erabiliz".

"Administrazio publikoen finantziazioa mugatzeko beharra", defendatu du Sanchezek, "irakurle baino finantzatzaile publiko gehiago dituzten hedabideak egon ez daitezen, eta zergapeko guztien diruarekin ildo editorialak erosten dituzten alderdi politikoak egon ez daitezen".

Pedro Sanchez Espainiako gobernuburua eta Francina Armengo Kongresuko presidentea, hizketan. Argazkia: EFE

Espainiako Gobernuak "herritarren ohorerako eta zuzenketarako eskubideak indartu" nahi dituela aurreratu du. "Hedabideek askeak izan behar dute, euren ildo editoriala garatzeko gai izan behar dute, eta, era berean, herritarrek euren burua defendatzeko aukera izan behar dute, baldin eta gezur edo funtsik gabeko akusazioak egiten bazaizkie".

Sanchezek zehaztu duenez, demokraziaren funtzionamendu zuzena eta adierazpen askatasuna indartzea eta informazio egiazkoa izateko eskubidea bermatzea da azken xedea.

"Ez da Gobernuaren misioa, ezta asmoa ere, komunikabideen artean fidagarritasun txartelak banatzea", adierazi du. Fidagarritasun hori "herritarrek eman behar diete, baina botere publikoen betebeharra da Europan adostutakoa garatzea", gaineratu du.

100 milioi Europako funtsetatik

Gainera, Espainiako Gobernuko presidenteak iragarri du 100 milioi euroko diru-laguntzak jarriko dituela martxan hedabideak digitalizatzeko.

100 milioi euro horiekin, komunikabideek produktibitatea eta kalitate informatiboa hobetzeko eta zibersegurtasuna indartzeko tresnak garatu ahal izango dituzte. Dirua Europako funtsetatik etorriko da, eta behar duten komunikabide guztietara joango dira, ildo editoriala edozein dela ere, esan duenez.

Bestalde, Espainiako agintariak Hauteskunde Legearen erreforma proposatu du, hauteskundeetako hautagaien arteko eztabaidak derrigorrezkoak izan daitezen eta enpresa soziologikoek "mikrodatuak" eta inkesten metodologia argitara eman ditzaten.

Erantzunen txanda

Mertxe Aizpurua EH Bilduren Kongresuko bozeramaileak Sanchezi ohartarazi dionez, "eskuin muturrak dopatutako organorik ez da hitzartu behar manipulazioa eta joko zikina betikotuko dutenekin", PSOEk eta PPk Botere Judizialaren Kontseilu Nagusia (BJKN) berritzeko itxitako itunari erreferentzia eginez.

"Erabateko demokrazia bitxia desinformatzen, prebarikatzen eta zelatatzen duena, ez duzu uste?", galdetu dio Espainiako gobernuburuari. Gainera, "itxaropena sortzeak eta neurririk ez hartzeak frustrazioa sor dezake", ohartarazi du.

Aitor Esteban EAJko bozeramaileak aitortu duenez, "arerio politikoek auzitegien erabilera maltzurra egiten dute". "Zu zeu bizitzen ari zara", esan dio diputatu jeltzaleak Sanchezi.

Ordezkari jeltzalearen ahotan, "akusatzaileak nortzuk diren" eta "argudio juridikoak" kontuan hartuta, "ziurrenik ez da Begoña Gomez Espainiako Gobernuko presidentearen emaztearen aurkako zigor-auzirik izango", baina "egin behar diren gauzak" daudela gogorarazi dio Espainiako agintariari.

Esquerrak eta Juntsek bat egin dute Espainiako Gobernuko presidenteak berrikuntza demokratikoaren alorrean egindako eskaintza "adarra jotzea" dela esatean.

ERCko Gabriel Rufian kexatu egin da Espainiako gobernuburuak ez duelako neurri propiorik mahai gainean jarri, eta Junts alderdiko Miriam Noguerasek bere egitasmoak porrot egingo duela iragarri du. Gainera, biek aurpegiratu diote Espainia birsortu nahi izatea, PPrekin BJKN berritzeko ituna egiten duen bitartean, nahiz eta PP "lokatzaren makinaren" egilea dela errepikatu.

Alberto Nuñez Feijoo PPko buruak hedabideak zentsuratzeko mehatxua egitea leporatu dio Sanchezi. "Espainiako bulorik handiena zu zara", esan dio Feijook Sanchezi.